Ragnhildur Lára Finnsdóttir

Áfram held ég að aðlaga heimilismatinn að litla krúttmolanum okkar. Eftir tvo daga af hamborgarhryggsáti (vegna frystitiltektar) sem nota bene Hugi fékk ekki að smakka, var alveg nauðsynlegt að fá fisk. Ég sendi því strákana mína út í fiskbúð. Við erum voða glöð að vera í göngufæri við fiskbúð, það er eitthvað svo næs að geta rölt með barnavagninn eftir fiski í soðið.



Þorskur með kryddsmjörsþekju
500 gr þorskur
smjör
kryddblanda
sætar kartöflur
butternut squash
salt og pipar
Spergilkál

Ég fékk þykkt og gott þorskstykki sem ég skar í 4 steikur og lagði í ofnfast mót. Svo hrærði ég saman smjör og frosna kryddjurtablöndu sem ég á, í henni er basil, óreganó og eitthvað fleira, en hvaða mildu kryddjurtir sem er ganga. Þessu var smurt á einn bitann en á hina bætti ég sítrónuberki og chili út í smjörið. Svo saltaði ég og pipraði fiskstykkin okkar foreldranna. Þetta var bakað í 10-15 mín á 200 °C. Svo bitaði ég 1 netta sæta kartöflu niður og um 1/3 squash og sauð. Ég bætti spergilkálsbitunum út í pottinn seinustu mínúturnar til að sjóða það líka. Svo veiddi ég kálið aftur upp úr og lagði til hliðar en maukaði saman sætu kartöfluna og squashið með vænni smjörklípu. Þannig var svo kvöldmaturinn hans Huga, en ég bætti cummin út í kartöflumúsina fyrir okkur. Þetta át hann með bestu lyst.

Hann er orðinn svo ákveðinn með það að vilja bara mat, það þýðir ekkert að bjóða honum upp á eitthvað mauk og borða svo eitthvað annað fyrir framan hann, svo ég passa að hann fái mat sem er eins eða svipaður okkar.

Þetta er mjög þægileg leið til að elda fisk, skella flaki í form og útbúa kryddsmjör með. Um daginn gerðum við lax með smjöri og dilli sem hitti líka vel í mark. Meðlætið með honum var kartafla og ofnbökuð gulrót.

Ég legg mikið upp úr því að Hugi minn borði hollan og góðan mat, hann fær mikið til lífrænan mat og ég sneiði hjá hveiti, geri og sykri og öllum aukaefnum eftir bestu getu. Það er auðvitað ekkert algilt, ekki síst eftir að hann fór að borða meira af matnum okkar.
Hann er nú að detta í 11 mánuði, en í 10 mánaða skoðuninni vorum við hvött til að gefa honum heimilismat, en ekki alltaf vera með einhvern sér smábarnamat. En  ég er auðvitað alveg að deyja úr fyrsta-barns-syndróminu og það er mjög erfitt, en ég er samt svona smám saman að komast upp á lagið með þetta og í leiðinni ýtir það á okkur að hafa hollan og góðan mat fyrir okkur.
Einn föstudaginn ákváðum við að búa okkur til pítsu og gefa honum líka. Þess vegna valdi ég að gera pítsubotninn hennar Sollu, pítsubotn úr grófu spelti. En ég var nú ekki alveg að fara að skella pepp, svepp og ananasi á pítsuna hans svo ég gerði sér álegg fyrir hann. Þetta endaði ábyggilega sem heimsins hollasta og leiðinlegasta pítsa, en ég sver það, hann hefur aldrei borðað jafn mikið á sinni stuttu ævi! Hann var með troðfullan munninn og hékk í erminni á mér til að flýta mötunina og át alla pítsuna upp til agna.
Þar sem þessi pítsa hitti svona í mark eru pítsudagar orðnir að föstum lið.

Litla matargatið

Pítsan hans Huga

Speltpítsudeig
agnarögn af pítsusósu eða tómatmauki
hakk
gulrót
sveppur
spergilkál
annað grænmeti eftir smekk
ögn af osti

Ég gerði pítsudeigið, tók svo smá bút af því og flatti út fyrir hann. Botninn bakaður í 5 mínútur í ofni. Á meðan steikti ég ögn af hakki og reif út í það 1 gulrót, 1 svepp og lítinn spergilkálsbút og kryddaði með oreganó. Þegar botninn var klár setti ég örfáa dropa af Hunts pítsusósu (enginn sykur í henni), setti hakkið yfir og loks örfáar ræmur af rifnum osti og bakaði í um 10 mínútur.
Hann hefur núna fengið pítsu aftur og var hún jafn vinsæl. Það er tilvalið að nota afgangskjöt og grænmeti á pítsuna, næst ætla ég að prófa að gefa honum pítsu með kjúklingi. Svo er líka sniðugt að gera nokkra svona litla botna og baka, smella þeim svo í frysti og þá er hægt að grípa botn, setja á hann álegg og hita á nóinu.
Ef það er afgangur af hakkinu þá er það alveg hinn fínasti hádegis- eða kvöldmatur daginn eftir, jafnvel með smá hýðishrísgrjónum eða speltpasta.

Það er nú meira hvað mér gengur hægt að blogga. Ég tek oft myndir af því sem ég er að bauka í eldhúsinu en svo verður mér ekkert úr því að koma því á netið. Þetta verður þá jafnvel bara haust-innleggið mitt á blogginu en það verður að hafa það, nógu bragðgóður var maturinn í það minnsta fyrir ársfjórðungsinnlegg.

Lambaskankar eru í miklu uppáhaldi hjá mér, eldaðir þannig að kjötið fellur af beinunum, í djúsí sósu og með kartöflumús. Þessi uppskrift er samblanda af uppskrift sem ég fann á netinu, uppskrift frá mömmu og því sem var til í ísskápnum.

Þetta er alveg frábær eldamennska því öllu er fleygt á pönnu, eða því sem næst, og látið malla, því lengur því betra. Vetrarfríið í skólanum hefst á morgun og því var þessi máltíð upphafið að langri helgi hjá okkur. Við ætlum ekki að fara neitt, en það er líka kósý að gera sér glaðan dag heima.

Mér finnst svo fínt að eiga litlar vínflöskur í eldhúsinu til að nota í matreiðslu, við drekkum svo lítið að lítil flaska dugar í uppskriftir og svo hálft glas sem er yfirleitt meira en nóg fyrir okkur. Verandi með barn á brjósti þá er maður ekki beint að skvetta mikið í sig, en akkúrat núna er litli kútur sofnaður svo mamman fær að sötra rauðvínið sem er í glasinu á myndinni, tveimur klukkutímum eftir máltíðina.

Ég eldaði bara tvo skanka, svo uppskriftin er samkvæmt því, en það er auðvitað tilvalið að gera 4-6 skanka fyrir stærri heimili eða fá fólk í mat. Þessi sósa ætti alveg auðveldlega að duga fyrir 3 skanka, en ég myndi tvöfalda hana fyrir 4-6 skanka. Sigurgeir torgaði heilum skanka en við Hugi deildum einum og eigum samt afgang í hádegismat á morgun. Ég skar kjötið innan út skankanum okkar fyrir hann, 9 mánaða guttar fá ekki mikið að smakka rauðvíns-tómatasósu. Hugi var líka mjög ánægður með matinn, hann borðaði allt sitt kjöt sem var sett út í gulróta-eplamauk og át svo vænan bita til viðbótar okkur til samlætis.

Rauðvínssósaðir skankar með mús 
fyrir 2-3

2 lambaskankar
ólívuolía
1/2 laukur
1 gulrót
1 hvítlauksgeiri
rósmarín
1-2 tsk hveiti
1/2 lítil rauðvínsflaska, kannski rúmlega, um 1 dl
1 dós tómatar saxaðir
1 dós vatn
4 vænir sveppir
1/2 paprika
salt og pipar
1/2 kubbur kjötkraftur ef vill
tómatsósa

Ég hitaði olíu í djúpu pönnunni minni og steikti skankana á hliðunum og botninum og saxaði á meðan lauk, hvítlauk og gulrót Tók þá upp úr, setti grænmetið á pönnuna og steikti. sáldraði hveiti yfir ásamt rósmarín og hellti svo rauðvíninu yfir og lét það sjóða. Bætti svo tómötum og vatni, kjötinu aftur út í, setti lokið á og lét krauma alveg vel og lengi, líklega í alveg 90 mínútur. Þá skar ég sveppina og paprikuna niður, bætti því út í og lét krauma án loks í 30 mínútur og kveikti undir kartöflum. Svo smakkaði ég sósuna til og bætti við meira rósmaríni, salti, pipar, tómatsósu og kjötkrafti.
Útbjó kartöflumús með kartöflum, rjóma, mjólk, smjöri og salti og bar fram í stórum djúpum skálum.
Þetta var virkilega góð máltíð, sem verður alveg ábyggilega elduð ansi oft á komandi haust- og vetrarkvöldum.

Eftir árshlé er kominn tími til að dusta rykið af lyklaborðinu og blogga aftur. Líf mitt hefur breyst svo mikið á þessu ári að það er eiginlega alveg ótrúlegt að hugsa til þess. Stærsta og merkilegasta breytingin er sú að verða móðir. En ástæða þess að ég hætti að blogga í fyrra var sú að ég varð ólétt og missti gjörsamlega alla löngun til að elda eða spá í mat, nokkuð sem mig hefði aldrei grunað að kæmi fyrir mig. Ég bjóst við því að verða þessi brjálaða cravings ólétta kona en ég fékk svona and-craving, mig langaði aldrei í neitt. En nú er elsku ljósið mitt hann Hugi orðinn rúmlega tveggja mánaða og matarlystin mín er komin aftur!
Ég er því núna heimavinnandi húsmóðir, í fæðingarorlofi með ungabarn á handleggnum og ég ætla að nota bloggið til að skrifa niður hugrenningar tengdar því og svo verður örugglega einhver matur á síðunum líka.

Þegar það kyngir niður snjó eins og núna þá eru ákveðnir réttir einhvernveginn það eina sem hægt er að elda. Þykkar súpur, kássur og allt það sem yljar manni að innan. Eftir að hafa borðað blómkálssúpu og grænmetiskássu alla vikuna var kominn tími á eitthvað kjötmeti. Ég eldaði því fulla pönnu af rjúkandi chili, það er mjög þægilegur réttur því maður þarf nokkurn veginn bara að henda öllu í pönnuna, skella lokinu yfir að hálfu og leyfa þessu að malla á meðan maður dundar sér við eitthvað annað.


Vetrarchili
100 gr chorizo pylsa
1 laukur
2 rauðar paprikur
1 pakki nautahakk, um 500 gr
1 teningur nautakraftur
1-2 tsk paprikuduft
1/2-1 tsk kummin
1 tsk oreganó
ögn af chiliflögum og/eða cayenne pipar eftir smekk ef vill
1/2 tsk hreint kakó
1 tsk púðursykur
1 lítil dós tómatpuré
1 dós hakkaðir tómatar
Skvetta af Worchestershiresósu ef vill
200-400 ml vatn
1 dós nýrnabaunir

Chorizo pylsan er skorin smátt og steikt á heitri pönnu. Laukur og paprikur söxuð niður og bætt út í pönnuna og steikt. Hakkinu bætt út í. Þegar hakkið er eldað í gegn er kryddinu og tómatpúrrunni bætt út í pönnuna og velt vel saman áður en tómötunum og vatninu er bætt út í. Þegar suðan er komin upp má gjarnan smakka réttinn til og krydda. Síðan að leyfa honum að malla á lágum hita í 30-60 mínútur. Baununum er bætt út í á seinustu 5-10 mínútunum. Borið fram með rifnum osti, sýrðum rjóma og jafnvel nachos flögum. Ég setti nachos flögurnar í fat, stráði osti yfir og hitaði í ofni þar til osturinn var bráðinn.

Fyrir 4

Það var frekar mikið að gera í seinustu viku og mataræðið mitt var ekki upp á það besta. Það var nú samt ekki pítsur og franskar, en við borðuðum svolítið mikið af take-away mat. Sem er auðvitað allt í fína af og til, en kannski ekki oftar en maður eldar sjálfur. Take-away réttir frá Bergsson og Saffran eru óóó só tasty.
En ég prófaði smá paleo bakstur áðan, ég datt inn á síðu sem heitir Elana's Pantry og það virðist vera mekka paleo-baksturs. Ég bjó til morgunverðarbrauð og bananamúffur og heppnuðust báðar uppskriftirnar ágætlega, en mér fannst svolítið mikið matarsódabragð af þeim báðum. Ég held reyndar ég sé voðalega viðkvæm fyrir matarsódabragði, finn það ansi oft. Næst myndi ég prófa uppskriftirnar með vínsteinslyftidufti.

Ég sleppti stevia úr morgunverðarbrauðinu og minnkaði hunangið. Áferðin og bragðið af brauðinu var gott (fyrir utan matarsódann). Ég væri til í að prófa það aftur og nota döðlur í stað hunangs.

Ég prófaði líka bananabrauðið, en gerði aðeins 1/3 af uppskriftinni og hellti deiginu í 5 muffinform og bakaði í um 20-25 mínútur. Múffurnar voru mjög bragðgóðar, en svolítið blautar. Ég held maður þurfi að fara mjög varlega í að mæla möndlumjöl, það væri örugglega best að vigta það alltaf.

Svo gat ég ekki ákveðið hvað ég ætti að borða í morgunmat í fyrramálið, múffu eða brauð svo niðurstaðan var að sjálfsögðu bæði. Ein múffa og 1/8 brauð pakkað í nesti og restin fór í frysti.

Ég fékk alveg extra langan konudag, nánast alveg konuhelgi því Sibbmundur bauð mér út að borða og í keilu á laugardagskvöld. Svo, þar sem ömmur okkar beggja voru í bænum buðum við þeim í kaffi á konudaginn ásamt mömmum okkar og endaði þetta í hinu ánægjulegasta konukaffi.

Á mánudag verð ég svo með vinkonuhitting og ég vildi því samnýta baksturinn sem best án þess að þurfa að bera fram hálfétnar kökur. Ég bakaði því hindberja mínímúffur og svo paleo-væna súkkulaðikökubita.
Ásamt því var ég með smásmákökur sem ég bakaði í gamni mínu úr möndluhrati og hrærði hitt og þetta saman við (möndluhveiti, banana, döðlur...). Þær voru ekkert svo sérstakar á bragðið, bara ágætar, þannig að ég smurði dökku súkkulaði yfir, og tataaah þær urðu mjög fínar! Ótrúlegt hvað smá súkkulaði getur bjargað öllu í heiminum. Svo var ég með kex og ost, te og kaffi.
Baksturinn var mjög auðveldur en mér tókst nú samt að klúðra smá, því ég gleymdi eins og einu eggi... en það kom held ég ekki að sök. Súkkulaðikökubitarnir eru uppskrift úr Gestgjafanum og inniheldur döðlur, epla- og bananamauk, kaffi, kakó, egg, kókoshveiti, kókosolíu, matarsóda og salt. Ég skar þær niður í litla bita og skreytti með grófum kókos.

Mínímúffurnar voru svo með hvítu súkkulaði og hindberjum, ásamt hvítum sykri, hveiti, smjöri, mjólk og umþaðbil öllu sem Paleo bannar. Ég fann þessa uppskrift einu sinni, ég breyti henni bara í mínímúffur og set eitt ber ofan í hvert form. Það sem mér finnast mínímúffur mikil dásemd. Mér finnst þetta alveg fullkomin stærð, venjulegar múffur eru oft svo brjálaðar að  fólk leifir meirihlutanum og það fer illa í mitt matarhjarta. Míní er málið. Svo eru bara um 60 kaloríur í hverri mínímúffu og það er nú ekki svo slæmt.

Hindberjamínímúffur
100 gr smjör-brætt
300 gr hveiti
100 gr sykur
2 tsk lyftiduft
2 egg
2 dl mjólk
u.þ.b. 48 hindber, frosin
100 gr hvítt súkkulaði

Hveiti, sykur og lyftiduft hrært saman í skál. Egg og mjólk hrærð saman í annarri skál og smjöri bætt út í. Eggjablöndunni hrært út í þurrefnin. Hvíta súkkulaðið saxað og hrært saman við. 48 pappírsform sett í mínímuffinmót, deigi skammtað þar á milli og einu frosnu hindberi stungið ofan í hvert form. Bakað við 200°C í 10-15 mínútur eða þar til toppurinn verður gylltur.

Ég gerði nýjan skammt af möndlumjólk í gær. Ég var komin með smá nóg af kókosmjólk, í öllu. Möndlumjólkin sem ég gerði í gær var síðan sú allra besta sem ég hef gert. Ég notaði fleiri döðlur og hreina vanillu (ekki dropa) sem ég var að splæsa í handa sjálfri mér.
Það er mjög létt að gera möndlumjólk. Maður leggur desilíter eða bolla af möndlum í vatn í 12-24 tíma (ég læt desilíter duga, mjólkin klárast ekki það hratt hjá mér). Svo er vatninu hellt af möndlunum og þær maukaðar í blandara ásamt 3-4 desilítrum (eða bollum) af vatni og 3-5 döðlum sem hafa legið í bleyti í 20 mínútur. Svo bragðbætti ég hana með hnífsoddi af vanillu og agnarögn af salti. Ég hellti maukinu í gegn um sigti og síðan aftur í gegnum (hreinan og ónotaðan) nælonsokk. Þá mjólkar maður vökvann í gegn, mjög skemmtilegt verk.  Svo fór hún í glerflösku og inn í ísskáp.

En ég held áfram að prófa bannflokkana eftir Whole30 og í gær/dag var glúteinlaust kornmeti prufa. Ég notaði því möndlumjólkina og bjó mér til krukkuhafra eins og ég borðaði svo mikið af í haust. Ég var búin að sakna þess að fá mér krukku með hafragumsi í morgunmat svo ég var mjög glöð í morgun. Í stað AB mjólkur og mjólkur notaði ég möndlumjólkina og setti hafra, chia fræ, banana og frosin hindber út í. Allt hrist saman í krukku og geymt í ísskáp yfir nótt.
Glúteinlausa kornmetisprufan fór reyndar í smá rugl hjá mér því mér bauðst óvænt að fara á sushinámskeið í gær. Ég greip að sjálfsögðu tækifærið og það var mjög skemmtilegt, en þá borðaði ég sushi með hrísgrjónum og soyasósu sem tilheyra sitt hvorum bannflokknum. En svona er þetta bara, og ég reyni svo að halda áfram næstu daga á hreinu og beinu brautinni.

Haltu á ketti hvað ísinn í gær var góður!!! Svona svo ég hrósi sjálfri mér svolítið mikið, vóts hvað mér fannst hann sjúklega góður. Hluti af því er ábyggilega sú staðreynd að ég var ekki búin að borða ís eða súkkulaði í rúman mánuð... en ég sleikti skálina nánast mér fannst hann svo góður. Una systir sagði að hún hefði viljað meiri sykur/döðlur í hann en við erum ekki með sömu sykurpallettuna og fólk getur auðvitað still sykurmagnið eftir behag. Mér fannst hann alveg akkúrat passlega sætur án þess að vera of, og dökkt súkkulaðibragðið naut sín. Næst prófa ég að gera hann úr kókosmjólk til að gera hann paleovænni.

Ég bjó til sunnudagsmorgunverð í morgun, einfaldar bananapönnsur með jarðarberjum og smá grískri jógúrt (þessi mjólkurdagur minn teygðist aðeins yfir í mjólkurhelgi, en bara fram að hádegi). Ég hafði heyrt af þessum "tveggja hráefna" pönnsum áður en hafði nákvæmlega enga trú á því að þær væru bragðgóðar. En ég hef gert þær tvisvar sinnum núna og þær koma ótrúlega vel út Alls ekki yfirþyrmandi eggjabragð eða áferð.

Bananapönnsur
Grunnurinn í þessum pönnsum er 1 þroskaður banani og tvö egg. Það þarf ekkert annað! Ég stappaði banana og skellti í könnu með tveimur eggjum og þeytti saman með töfrasprota. Svo bræddi ég rúma teskeið af kókosolíu á pönnukökupönnu og hellti út í ásamt kanilklípu og saltkorni. Ég steikti svo litlar lummur á tæpum miðlungshita úr deiginu og borðaði með niðurskornum ferskum jarðarberjum ásamt grískri jógúrt með döðlumauksskvettu í. Ég borðaði ekki allar pönnsurnar ein, en alveg vel rúman meirihluta. Ótrúlega góður sunnudagsmorgunmatur og skemmtilega hollur!

Súkkulaðiís með döðlum í stað sykurs

Nú er ég búin með Whole30 prógrammið. Það gekk mjög vel, ég svindlaði ekkert og borðaði kjöt, fisk, grænmeti, ávexti, hnetur og fræ í 30 daga. Ég missti 4.5 kíló og sef betur, vakna auðveldar og finn ekki fyrir brjáluðum sykur-craving-köstum. Ásamt þessu hef ég verið að lesa bóka sem fylgir prógramminu, It starts with food og samkvæmt henni á ég að bæta inn bannflokkunum í mataræðið, einum í einu til að sjá hvort líkaminn bregðist illa við þeim. Ég stefni samt á að fylgja Paleo mataræðinu áfram, en það er fínt að vita hvort eitthvað fer verr í mig en annað.
Í dag er mjólkurvörudagur og samkvæmt prógramminu á ég að borða jógúrt, ost og ís í eftirrétt. Það finnst mér nú alls ekki slæmt!! Ég fékk mér því gríska jógúrt með jarðarberjum og bananabitum í morgunmat, í kvöld verður kjúklingur með spínati og mozzarella og heimatilbúinn ís í eftirrétt.
Ég er svo ánægð með að hafa tekið allan sykur út úr mataræðinu mínu svo ég var í smá klípu með ísinn. Mig langaði ekki að kaupa búðarís stútfullan af sykri og vildi heldur ekki nota gervisykur þannig að ég lagði höfuðið í bleyti og viti menn, ég fékk hugmynd. Mér datt í hug að nota döðlumauk í stað sykurs og las mér aðeins til á netinu og það er víst fullt af fólki í heiminum sem gerir þetta. Auðvitað er sykur í döðlum, en hann er þó allavega enn í sínu náttúrulega formi, ekki unninn og samanpressaður. Svo keypti ég dökkt lífrænt ræktað 70% súkkulaði til að bragðbæta ísinn og notaði bara 50 grömm í skammtinn.
Við verðum fjögur sem borðum saman í kvöld þannig að það er ekki hætta á að ég borði allan ísinn ein heldur. En hér kemur uppskriftin, ísinn er í frysti núna svo ég get ekki sagt til um lokaútkomu en bragðið af honum ófrystum var allavega mjög gott og ég hlakka mikið til að smakka hann í kvöld:

egg og döðlumauk

Döðlu- og súkkulaðiís
3 eggjarauður
65 g döðlumauk*
1 tsk vanilludropar
u.þ.b. 50gr 70% súkkulaði (ég notaði 4 lengjur af G&B súkkulaði)
250 ml rjómi

Þeyttu eggjarauðurnar með döðlumauki og vanillu (ég notaði töfrasprotann, til að döðlumaukið myndi örugglega tætast í algjörar öreindir því ég nennti ekki að sigta döðlutætlur úr). Bræddu helminginn af súkkulaðinu og hrærðu út í eggjablönduna. Þeyttu rjómann í annarri skál og hrærðu eggjablönduna varlega út í. Saxaðu hinn helminginn af súkkulaðinu smátt og hrærðu út í ísblönduna. Helltu í box og frystu.



*Döðlumauk
60 gr döðlur
1/4 b sjóðandi vatn
Saxaðu möndlurnar niður í bita eða sneiðar og leggðu í skál eða krukku. Helltu sjóðandi vatni yfir og láttu döðlurnar mýkjast í því í 20-30 mínútur. Maukaðu með töfrasprota.
Ef þessi ís heppnast jafn vel og ég held hann muni gera, þá mun ég jafnvel prófa seinna að gera hann alveg Paleo og nota dós af kókosmjólk í stað rjómans. Það var eitthvað eftir af döðlumaukinu, ég þarf að finna eitthvað gáfulegt til að nota það, en í versta falli er teskeið af því örugglega góð með grískri jógúrt.

 Ég bjó til eggjaböku fyrir barnaafmæli hjá systur minni í dag. Hún heppnaðist mjög vel og hvarf fljótt á veisluborðinu. Ég var búin að skoða einhverjar uppskriftir sem viðmið og henti svo saman í þessa. Mjög góð og hentug í boð. Hún er Paleo, en auðvitað virkar svona baka fyrir alla.

Eggjabaka
200 gr beikonkurl
1/2 laukur
2 hvítlauksrif
1/2 pakki sveppir
120 gr frosið spínat
8 egg
1/4 bolli kókosmjólk
1 tsk óreganó
1 tsk timjan
1 tsk vínsteinslyftiduft
salt og pipar
12 kirsuberjatómatar

Hita ofn í 200°C. Ég steikti beikon á pönnu og setti svo til hliðar. Skar lauk, sveppi og hvítlauk niður og steikti í beikonfitunni og setti svo með beikoninu til hliðar og kældi. Afþýddi spínatið og kreisti vökvann úr. Skar það niður.  Hrærði eggin, kókosmjólkina og kryddið saman. Smurði eldfast mót með olíu og dreifði beikonblöndunni í botninn. Svo dreifði ég spínatinu yfir og hellti svo eggjablöndunni yfir. Ég skar tómatana í helminga og raðaði ofan á og bakaði svo bökuna í ofni í um 30-35 mínútur.

Bara svo það sé á hreinu, þá eru þetta loftbólur, ekki kekkir :)

Ég datt niður á uppskrift á netinu að "kaffirjóma" án mjólkur í kaffið, Paleostyle. Ég er búin að drekka kaffi með kókosmjólk út í hingað til og það er bara ekki alveg nógu gott. Það kemur svo mikið yfirþyrmandi kókosbragð og stundum bætist jafnvel eitthvað rammt bragð við. En þessi uppskrift gerir léttan og froðukenndan kaffirjóma með kókoskeim, en ekki of miklum. Ég hermdi alveg eftir og útkoman var svona líka ljómandi. Ég hlakka til að mæta í vinnuna á mánudaginn og geta drekkt mér í kaffi!

Kaffirjómi
1 dós kókosmjólk
1 egg
2 msk kókosolía
nokkrir dropar vanilla

Öllu skellt í blandara og þeytt vel saman. Nokkrar teskeiðar í rjúkandi kaffibolla og restin í box eða krukku og inn í ísskáp. Svo má örugglega nota þetta líka eins og skeið af þeyttum rjóma ofan á ávexti. 

Ég fattaði allt í einu að það eru alveg vikur síðan ég borðaði seinast fisk! Ekki gott hjá manneskju sem er að vanda sig við að borða hollan og fjölbreyttan mat. Í matinn var ég með mjög fljótlegan og góðan fisk sem tók enga stund að elda og enga stund að borða.

Pestó þorskur með grænmeti
Þorskur fyrir 2-3
Paleo pesto sjá hér
2-3 tómatar
olía/smjör
1 hvítlauksrif
1/2 paprika
1/3 kúrbítur
sveppir

Hita ofn á 200°C. Ég setti þorskinn í eldfast mót, saltaði og pipraði og smurði svo vel af heimalöguðu pestói yfir. Skar tómata í sneiðar og raðaði yfir. Setti í ofn í 15-20 mínútur. Svo skar ég grænmetið niður og steikti á pönnu í smá smjöri og hvítlauk. Með þessu bar ég fram einfalt salat með káli, papriku, gúrku, jarðarberjum og olíu og balsam. Ég var líka með niðursneitt grænmeti ásamt hummus sem snarl. Einfalt og gott, máltíð á innan við hálftíma.

Ég fæ alltaf fréttabréf frá Sollu á Gló í tölvupósti. Í þessari viku sendi hún uppskrift að hráfæðis "hummus" þar sem kúrbítur og kasjúhnetur koma í stað kjúklingabauna. Ég ákvað að henda í einn skammt til að prófa, en ég hafði svosem ekki miklar vonir um bragðið enda finnst mér alvöru kjúklingabaunahummus innilega virkilega sjúklega gott. En haltu á ketti hvað þessi uppskrift kom skemmtilega á óvart!! Ég held það væri auðveldlega hægt að plata fólk með þessari dýfu. Áferðin og bragðið eru alveg spot on. Ég fór aðeins of frjálslega með sítrónusafann og ætla að passa mig aðeins á honum næst, bæði bragðsins vegna og þykktarinnar en ég get svo sannarlega mælt með þessar dýfu með skornu grænmeti í millimál og snarl.

Núna ætla ég að elda smá butternutsquash súpu til að taka með mér í matarboð á morgun. Ég veit það hljómar pínu klikk, en það verður saltkjöt og baunir í matinn í afmælinu hans pabba á morgun og mér datt í hug að elda appelsínugula súpu til að borða ásamt smá saltkjöti, þá er ég næstum eins og hinir. Ég skipti bara út rjómanum í uppskriftinni fyrir kókosmjólk og vona að hún verði ágæt.

Í kvöld gerði ég mjög léttan "einnar pönnu" kvöldverð. Ég keypti svínakjöt í búðinni, því miður voru svínakótilettur ekki til svo ég keypti snitzel, en ég mæli með svínakótilettum. Kryddaði með salti og pipar og smurði smá Dijon sinnepi yfir líka sem ég hræði með ögn af olíu og þurrkuðu timjani. Steikti svo báðu megin á pönnu í hreinsuðu smjöri. Þegar ég var búin að snúa kjötinu og steikja það ögn bætti ég 5 niðursneiddum sveppum á pönnuna og setti lok yfir. Þetta mallaði í smá stund þannig að það myndaðist soð á pönnunni með sveppunum. Borðaði þetta svo með salati. Fínasti kvöldverður sem tók um 10 mínútur að elda.

Ég nýtti sunnudaginn aðeins í undirbúning fyrir matseld vikunnar. Ísskápurinn var orðinn tómlegur svo ég skellti mér í Iceland og verslaði inn grænmeti, ávexti, fræ, kókosmjöl og kjöt. Svo bjó ég til paleo-vænt pestó sem ég ætla að nota á fisk í vikunni, "hreinsað" smjör samkvæmt paleo staðli (og notaði þessa lýsingu sem stuðning) og nýjan skammt af kókossmjöri (sjá hér). Ég er alveg sjúk í kókossmjör, fæ mér teskeið af því með döðlu á kvöldin þegar mig vantar eitthvað sætt.

Paleo pestó
1 pakki basil
væn lúka klettakál
2-3 msk furuhnetur
salt og pipar
ólífuolía
ögn sítrónusafi
Ég skellti öllu í blandara og maukaði vel saman, smakkaði til með salti, pipar og sítrónusafa. Heimagert pestó ætti að duga í svona viku í ísskápnum og svo má líka frysta það í klakaboxi.

Samkvæmt internetinu á að vera fínt að nota kókossmjör í stað smjörs, til að bragðbæta kaffi, sjeika og fleira. Ég hinsvegar stelst bara í það til að fullnægja nammiþörfinni.

Hreinsaða smjörið er svo notað eins og smjör, til að steikja og út í sætukartöflumús og þess háttar. Mér finnst það muna mjög miklu að geta notað smjör, kókosolía og ólífuolía eru bara ekki það sama.

Ég gerði Paleo útgáfu af kvöldverði sem við borðum mjög reglulega. Kjúklingabringur, kartöflumús og sveppasósa. Það er í miklu uppáhaldi hjá okkur báðum og algjör kósý-comfort matur.  Ég þurfti bara aðeins að útfæra matinn til að gera hann paleovænan og heppnaðist hann mjög vel. Ég er farin að elda meira af heilum kjúkling, það er einfalt og þá verður kjöt afgangs fyrir salat daginn eftir og ég get notað beinin í kjúklingasoð. 

Ég er búin að vera alveg sjúk í súpur undanfarið. Það hentar líka vel fyrir Paleo-átakið því þá get ég eldað mikið magn í einu og skipt niður í einingar fyrir hádegismat. Í stað þess að útbúa hádegismat á hverju kvöldi fyrir svefninn. En ég er núna búin með 11 daga af Whole30 átakinu og ég er ekki frá því að ég finni mun. Ég sofna mjög hratt á kvöldin, jafnvel fyrr en venjulega og ég glaðvakna við klukkuna. Það breytir því þó ekki að ég snúsa yfir mig hehe. Ég kúri bara áfram. Svo hef ég ekki fundið neitt til í maganum en mér hefur alltaf verið frekar bumbult og með ónot í maganum á morgnanna, alveg síðan ég var lítil. Þannig að líklega hefur þetta mataræði einhver jákvæð áhrif á mann.

Ég var að klára að sjóða kjötsúpu, það er nú ekki erfitt að Paleo-væða kjötsúpu. Sleppa hvítu kartöflunum og sleppa krafti og grjónum. Ég gerði stútfullan 5 lítra pott af kjötsúpu og hún er troðin af grænmeti. Mjög fín.

Kjötsúpa

1-1.2 kíló súpukjöt
2 lítrar vatn
1 msk salt
1 rófa
4 gulrætur
1/2 sæt kartafla
1/3 grasker (butternut squash)
1/2-1 hvítkálshaus
1-2 msk súpukrydd
1-2 lárviðarlauf ef vill
salt og pipar eftir smekk

Setjið vatn í pott og komið suðu upp. Þerrið kjötið og snyrtið til og bætið því út í vatnið ásamt salti. Látið sjóða í um 40 mínútur og fleytið ofan af vatninu ef þarf. Skerið grænmetið niður í sneiðar eða bita eftir smekk. Eftir 40 mínútur má taka kjötið upp úr og skera niður í þægilega munnbita og fjarlægja bein og fitu ef vill, og setja kjötið svo aftur út í. Bæta svo súpujurtum og öllu grænmetinu fyrir utan hvítkálið út í pottinn. Það þarf að sjóða í um 15-20 mínútur. Setjið hvítkálið út í 5-10 mínútum síðar. Smakkið súpuna svo til með salti og pipar.
Súpan er auðvitað ekki nákvæmlega eins og kjötsúpa, því það er svo rótgróið í bragðlaukunum að hafa kartöflur með en engu að síður kemst hún mjög nálægt "the real thing". Það eina sem mér finnst slæmt er að geta ekki klárað máltíðina með því að teyga ískalt mjólkurglas eins og venjulega eftir kjötsúpu.

Ég ætla líka að ítreka að það er mikið af grænmeti, ég hef ekki bestu rýmisgreindina og viðurkenni það fúslega. Ég þurfti að fiska kjötið upp úr pottinum og skera það af beinunum því annars hefði súpan flætt upp úr pottinum eftir að grænmetið fór út í! Fólk verður bara að meta það fyrir sig hvað er passlegt magn grænmetis. Svo má auðvitað nota annað grænmeti eða sleppa einhverju.

Ég ákvað að malla kjúklingasúpu í kvöldmatinn, bæði
til þess að nýta kjúklingasoð sem ég bjó til um helgina og líka til að elda nógu stóra máltíð til að geta notað afgang í nesti í hádegismat. Ég eldaði heilan kjúkling á laugardag og ákvað að prófa að útbúa soð. Beinin fóru í pott ásamt öllu skinninu og því sem var afgangs, fyrir utan kjötið, ásamt vatni, lárviðarlaufi, gulrót, sellerístöngli, 1/2 lauk, piparkornum og ögn af salti. Þetta sauð ég niður í einhverja 3-4 klukkutíma, síaði og setti í ísskáp. Ég hef aldrei áður gert soð og veit ekki hvort þetta sé besta leiðin til þess en það allavega varð soð úr þessu. En auðvitað má fólk nota kraft og vatn, mjög einfalt mál. Svo notaði ég þessa uppskrift sem viðmið að súpunni, en fór aðeins útfyrir rammann.

Kjúklingasúpa 
2 msk kókosolía
1 laukur saxaður
2 hvítlauksrif rifin
stór engiferbútur rifinn
1 rautt chilli saxað
4 gulrætur, rifnar
2 græn epli, rifin (næst ætla ég bara að nota eitt epli)
stór matskeið karrí
heimalagað kjúklingasoð, eða 1-2 teningar +vatn
2 dósir hakkaðir tómatar
2 dósir kókosmjólk
1-2 dósir vatn
1200 g kjúklingalundir eða bringur
salt og pipar
ferskur kóríander
Svo smakkaði ég súpuna til með þessum kryddum: karrí, tandoori, cummin, cayenne pipar, paprika, chili powder. Mér finnst betra að hafa smá svona kick í vetrarsúpum.

Steikti lauk, hvítlauk, engifer og chili úr olíu í 5 lítra potti. Bætti svo gulrótum og eplum út í ásamt karrý. Smellti svo soðinu út í ásamt tómötunum og sauð saman á meðan ég skar kjúklinginn í bita, í um 15 mínútur. Bætti 2 dósum af kókosmjólk út í og skolaði innan úr þeim með heitu vatni og bætti út í. Náði upp suðu og bragðbætti súpuna með kryddunum sem eru talin upp hér að ofan, dash af hverju, henti svo kjúklingnum út í og lét hann eldast og malla í súpunni þar til ég gat ekki beðið lengur afþví ég var orðin svo svöng.
Jós í skálar og klippti ferskt kóríander yfir.

Ég bjó til eins konar fajitas í kvöldmatinn, án þess að nota tortillur. Mér datt í hug að prófa nota kál til að vefja í. Ég átti reyndar bara lambhagasalat og það er ansi þunnt og viðkvæmt en þetta kom samt alveg fínt út, en væri líklega betra með einhverju sterkara káli. Hinsvegar var ég svo upptekin af þessu brasi mínu að ég steingleymdi að taka myndir! En hér kemur uppskriftin allavega:

"Fajitas" fyrir tvo
1 pakki kjúklingalæri, úrbeinuð og skinnlaus
1 msk kókosolía
1 hvítlauksrif
1/2 rautt chili
lítill engiferbúti
salt og pipar
paprikuduft
cummin
kóríander (kryddið)
óreganó
1/2-1 paprika, eftir stærð
nokkrir sveppir
stilkar af fersku kóríander

Ég hitaði olíuna á pönnu og skar kjúklinginn niður í bita og steikti. Reif hvítlaukinn og engiferið niður og saxaði hálft chili og bætti út í kjötið. Kryddaði svo með paprikudufti, cummin, kóríander, ögn af óreganó og salti og pipar. Þegar kjúklingurinn var orðinn steiktur skar ég paprikuna í lengjur og sveppina í sneiðar og bætti út á pönnuna og steikti smá með kjötinu ásamt stilkum af kóríander sem urðu afgangs frá guacamoleinu.

Guacamole
1 þroskað avókadó
1/4 rautt chilli
1/2 lime
ferskt kóríander
salt og pipar
Kirsuberjatómatar

Ég stappaði avókadóið niður, saxaði chilli og kóríander og bætti út í og kreisti safann úr hálfu lime yfir og saltaði og pipraði. Ég skar nokkra kirsuberjatómata út í en bar restina af þeim fram með matnum.

Svo tók ég lambhagasalatblöð og skellti  guacamole á þau, kjötinu og paprikublöndunni og sneiðum af tómat, vafði saman og borðaði.

Ég var að hugsa um að búa til ferskt salsa líka með, en nennti því svo ekki. Það væri samt ábyggilega mjög gott með.

Ég er komin á sjötta dag í Whole30 og mér gengur bara ótrúlega vel finnst mér. Ég hef ekkert svindlað og ég er að spá hvort það henti mér hreinlega betur að vera með eitthvað svona strangt prógramm þar sem ég bara má ekki fá svo mikið sem einn bita af pítsu í stað þess að reyna að fá mér bara eina sneið...
Það eina sem mér finnst svolítið vefjast fyrir mér er morgunmaturinn, ég hef ekki lyst á afgang af kvöldmat á morgnanna og ég vakna ekki nógu snemma til að brasa egg og beikon eða eitthvað. En ég hef gert nokkra græna sjeika og þeir eru allir að koma til hjá mér. En ég gerði líka þessar mini eggjakökur í vikunni og þær komu rosa vel út. Ég sá þessa uppskrift hér, og notaði hana sem viðmið. Ég átti hamborgarhryggssneiðar frá Kjarnafæði (enginn sykur í þeim) og notaði í botninn og hliðarnar. Ég smakkaði þessar fyrst heitar og þær voru allt í lagi þannig, en svo fannst mér þær mun betri kaldar, ég borðaði tvær í morgunmat í bílnum ásamt nokkrum kirsuberjatómötum.

Mini eggjakökur 6 stk
6 sneiðar hamborgarhryggsálegg
2 msk olía
1/4 laukur
100 g sveppir
2 bitar frosið spínat (ca 130 gr), afþýtt og kreist
4 egg
2 tsk kókosmjólk/möndlumjólk
1 tsk kókos-/möndluhveiti*
6-12 kirsuberjatómatar (ég notaði 6 en fannst það svo of lítið, mæli með að auka magnið í 9-12)
salt og pipar
*ég var nýbúin að gera möndlumjólk og setti tæpa teskeið af hratinu út í eggjahræruna en það má held ég alveg sleppa því. Ég ætlaði að nýta hratið í eitthvað, en restin af því endaði í ruslinu.

Hita ofn í 190°C. Ég gleymdi að sjálfsögðu að smyrja muffinformið en það má gjarnan nota helminginn af olíunni til þess. Svo skar ég hamborgarhrygginn niður þannig að einn hluti fór í botninn á muffinformi og tveir hlutar meðfram hliðunum. Það skiptir engu hvort þetta verði eitthvað súper fínt. Svo fór matskeið af olíu á pönnu og laukurinn og sveppirnir steiktir og svo kældir aðeins. Eggin hrærð saman ásamt kókosmjólk, salti og pipar og möndluhrati. Grænmetinu svo hrært út í og eggjahrærunni hellt út í muffinmótin með kjötinu. Kirsuberjatómatar helmingaðir eða fjórðungaðir og settir ofan á. Bakað í ofni í 25-30 mínútur eða þar til tilbúið.
Næst ætla ég að prófa að minnka spínatmagnið og bæta við rifnum gulrótum og papriku og jafnvel krydda með timíani eða óreganó.