Ragnhildur Lára Finnsdóttir

Ég bjó til eins konar fajitas í kvöldmatinn, án þess að nota tortillur. Mér datt í hug að prófa nota kál til að vefja í. Ég átti reyndar bara lambhagasalat og það er ansi þunnt og viðkvæmt en þetta kom samt alveg fínt út, en væri líklega betra með einhverju sterkara káli. Hinsvegar var ég svo upptekin af þessu brasi mínu að ég steingleymdi að taka myndir! En hér kemur uppskriftin allavega:

"Fajitas" fyrir tvo
1 pakki kjúklingalæri, úrbeinuð og skinnlaus
1 msk kókosolía
1 hvítlauksrif
1/2 rautt chili
lítill engiferbúti
salt og pipar
paprikuduft
cummin
kóríander (kryddið)
óreganó
1/2-1 paprika, eftir stærð
nokkrir sveppir
stilkar af fersku kóríander

Ég hitaði olíuna á pönnu og skar kjúklinginn niður í bita og steikti. Reif hvítlaukinn og engiferið niður og saxaði hálft chili og bætti út í kjötið. Kryddaði svo með paprikudufti, cummin, kóríander, ögn af óreganó og salti og pipar. Þegar kjúklingurinn var orðinn steiktur skar ég paprikuna í lengjur og sveppina í sneiðar og bætti út á pönnuna og steikti smá með kjötinu ásamt stilkum af kóríander sem urðu afgangs frá guacamoleinu.

Guacamole
1 þroskað avókadó
1/4 rautt chilli
1/2 lime
ferskt kóríander
salt og pipar
Kirsuberjatómatar

Ég stappaði avókadóið niður, saxaði chilli og kóríander og bætti út í og kreisti safann úr hálfu lime yfir og saltaði og pipraði. Ég skar nokkra kirsuberjatómata út í en bar restina af þeim fram með matnum.

Svo tók ég lambhagasalatblöð og skellti  guacamole á þau, kjötinu og paprikublöndunni og sneiðum af tómat, vafði saman og borðaði.

Ég var að hugsa um að búa til ferskt salsa líka með, en nennti því svo ekki. Það væri samt ábyggilega mjög gott með.

Obbosí hvað það er langt síðan ég bloggaði. Jólin komin og farin og nýárið ekkert svo nýtt lengur. Mér til afsökunar var ég að byrja í nýrri vinnu og að útbúa heimagerðar jólagjafir... svo er ég bara búin að vera södd eftir gamlárs og er rétt núna að koma mér í gírinn, haha.
Ég strengdi engin áramótaheit þannig, en ég held það gerist hjá flestum að þegar nýtt ár gengur í garð að maður fer að spá í hvað er hægt að gera til að bæta sig í lífinu. Það er tvennt hjá mér. Mig langar að vera duglegri að hitta vini mína, stinga upp á kaffihúsahittingi eða bjóða fólki til mín að tilefnislausu og algjörlega casual. Ég dett svo oft í að það verði að hóa saman "öllum hópnum" eða gera eitthvað sérstakt og hafa extra fínt og huggó en það er ekki aðalmálið. Hitt atriðið mitt kemur svo þessu bloggi meira við og það er að vera heilsusamlegri. ííík. En eitt skref í einu og ég ákvað eftir ekki svo mikla umhugsun og smá skyndiákvörðun að taka Whole30 áskorunina í Paleo mataræðinu. Ég hef aðeins lesið mér til um þetta og veit svosem ekki hvort þetta sé best í heimi eða ekki en það kemur í ljós. Og það er frekar ólíklegt að grænmeti, ávextir, kjöt og fiskur drepi mig á 30 dögum.
En ég er á öðrum degi áskoruninnar, fyrsti dagurinn gekk vel. Eina vandamálið mitt  var að drekka kaffið mitt svart. Dagurinn í dag var aðeins erfiðari, og ég er enn frekar óörugg með hvað má og má ekki. Ég bjó mér til hristing í morgunmat úr spínati, epli, banana, sellerí, engifer, lime, möndlum og smá vatni. Ég er ekki með það alveg á hreinu hvort það sé í lagi að búa til hristing eða ekki en ég hafði eiginlega ekki val um neitt annað í morgun. Nema hvað helvítið blandaðist ekki nógu vel og ég var á hraðferð að venju og endaði á að pína ofan í mig kekkjóttan hristing og kúgast í bílnum. En niður fór hann samt og bragðið var ekki slæmt, bara áferðin.

En kvöldmaturinn í kvöld heppnaðist mjög vel fannst mér og ég ákvað því að henda þeirri uppskrift hingað inn, ég veit ekki hvort það sé einhver hér sem vill nýta sér Paleo vænar uppskriftir en þá get ég allavega haft þetta fyrir mig :)



Hakk og hvítlauksblómkálsmús

Hakk og grænmeti
olía
1 laukur saxaður
1 hvítlauksrif rifið
2 gulrætur saxaðar
2 sellerístilkar rifnir
1 paprika söxuð
5 sveppir saxaðir
1 pakki hakk (var með blöndu af nauta og svína)
1-2 msk tómatpúrra
tómatar í dós
salt og pipar
basilíka þurrkuð
óreganó þurrkað
ítölsk kryddblanda
chilipiparflögur
balsamedik skvetta

ég setti smá olíu í pönnu og steikti grænmetið, steikti svo hakkið og blandaði þessu saman. Hrærði tómatpúrru og tómata í dós út í og kryddaði svo hakkið, ég mældi það ekkert heldur kryddaði bara svolítið vel, enda er enginn kjötkraftur í réttinum. Svo setti ég lokið á pönnuna og lét þetta malla á meðan ég gerði blómkálið klárt.

Hvítlauksblómkálsmús
1 blómkálshaus, skorinn í bita
1 msk olía
1-2 hvítlauksrif, rifin
1 tsk rósmarín
salt og pipar

Ég sauð blómkálið í vatni í potti, en þeir sem geta gufusoðið eiga að sjálfsögðu að gera það. Þegar blómkálið var soðið skellti ég því í sigti og setti olíuskvettu í pottinn og hvítlaukinn, rósmarínið, saltið og piparinn út í. Þegar hvítlaukurinn var búinn að malla smá í olíunni slökkti ég undir pottinum og setti blómkálið út í pottinnn og stappaði með kartöflustöppu. Þegar ég var búin að því tók ég töfrasprota og maukaði blómkálið betur.

Úr þessu varð alveg fínasta máltíð, það er svolítið mikið hvítlauksbragð af blómkálinu, ég notaði tvö rif en það var samt svo gott. Það er kannski nóg að nota eitt.

Helgin kom og fór á ótrúlegum hraða að vanda. Það var víst annar í aðventu í gær og jólaundirbúningurinn smá mjakast hjá mér. Ég er samt alltaf miklu duglegri að hugsa um hvað það væri skemmtilegt að framkvæma hitt og þetta í aðventunni en að bretta upp ermar og axjúallí gera hlutina. Það eru þó allavega komnar seríur í alla glugga og ég bakaði eina sort í gær, auk þess sem ég eyddi mestum hluta laugardags í Smáralind. Keypti reyndar bara pakka handa sjálfri mér, en það er þá allavega frá!
En ég er barasta frekar ánægð með hvað ég gerði margt í eldhúsinu um helgina, ég bjó til ljúffengt humarpasta á laugardagskvöld, æðislegar bananavöfflur í árbít á sunnudag og bakaði smákökur a la mamma. Svo gerði ég nokkrar prufur að jólapakkadótaríi sem ég get ekki sagt frá strax. Hæ fjölskylda!

Mér fannst svo ofboðslega kósý hjá okkur Sibbmündi á deitkvöldinu í seinustu viku þegar við borðuðum hreindýr að ég ákvað að hafa aftur svona kósý laugardag. Við eigum alls kyns góðgæti í frysti, humar og nautasteik og fleira, sem við erum ekki nógu dugleg að elda úr, ég er alltaf að bíða eftir einhverju spes tækifæri. En það er argasti kjánaskapur, auðvitað á maður bara að halda upp á hversdaginn líka, carpe diem og allt það. Ég skoðaði einhverjar uppskriftir á netinu að humarpasta, en þar var laukur, sellerí og fleira grænmeti sem mér finnst alls ekki passa með humri, svo ég ákvað bara að láta tilfinninguna ráða hendi. Útkoman var rosalega gott, rich humarpasta með hvítlauks-rjómasósu. Namm. Þetta er það sem ég gerði:

Humarpasta fyrir tvo
9 vænir humarhalar (magn eftir stærð og matarlyst)
2-3 hvítlauksrif
smjör
sítrónusafi
sítrónubörkur
steinselja
hvítvín
rjómi (ég notaði venjulegan, en myndi mæla með matreiðslurjóma)
salt og pipar
140 g Tagliatelle pasta
Ég sauð pastað samkvæmt leiðbeiningum á pakkanum. Humarinn var í skelinni svo ég skelfletti og hreinsaði hann. Svo setti ég smjör á pönnu ásamt rifnum hvítlauk og þegar það var orðið heitt skellti ég humrinum út í og bætti svo safa úr hálfri sítrónu út í. Þegar humarinn var rétt svo eldaður í gegn tók ég hann upp úr og lagði til hliðar og hellti u.þ.b. 1/2-1 dl af hvítvíni út í og lét vínið aðeins sjóða úr, ásamt rifnum berki af eins og fjórðungi af sítrónu. Svo bætti ég rjómaskvettu út í og hitaði vel. Ég saxaði steinselju og bætti út í sósuna og tók smá af pastavatninu og bætti saman út, svo sósan myndi loða vel við pastað. Svo fór pastað sjálft og humarinn ofan í og ég hrærði þetta vel saman.

Ég bar þetta fram með steinbökuðu baguette brauði sem ég fann í Bónus, og það var mjög gott. Ég ætlaði að láta sósuna vera nægilega mikla til að geta dýft brauðinu ofan í, en hún var það þykk að það gekk eiginlega ekki upp. Ég setti því ögn af smjöri og sítrónusafa í pott með hvítlauksrifi og bræddi saman til að geta dýft brauðinu í. Himneskt. Eina krítíkin sem ég hef á réttinn eins og ég gerði hann var að ég var aðeins of rausnarleg á rjómaskvettuna, næst myndi ég passa betur upp á skvettumagnið (nýtt orð) og helst nota matreiðslurjóma. En mikið var þetta gott. Í eftirrétt/kvöldsnarl voru svo jólamandarínur, enda hefur maður enga lyst á einhverju öðru gúmmelaði á eftir þessu.

 Við fengum óvænt gefins hreindýrasteik á föstudaginn og ákváðum að gera okkur glaðan dag á laugardagskvöld með steik og fíneríi. Það veitti ekki af því við erum bæði búin að vera á fullu í alls kyns verkefnum og vinnu og höfum undanfarið lifað á tilbúnum eða súper fljótlegum og einhæfum mat. Við reyndum þó að gera máltíðina frekar einfalda (lesist, sem minnst uppvask) en þetta endaði samt í mjög góðri og sparilegri máltíð. Ég vildi að við værum miklu duglegri að taka okkur til og hafa fínt fyrir okkur tvö, það er svo skemmtilegt.

Steikin var frosin á föstudag og ég lét hana standa í skál í ísskáp yfir nótt og lét hana svo standa á borðinu í góðan tíma á laugardaginn með smá ólívuolíu, salti og pipar. Svo tók ég saman alls kyns grænmeti; kartöflur, sæta kartöflu, rófu, gulrætur og grasker (butternut squash) sem ég skar niður í teninga og setti í fat með smá vatni, olíu, salti, pipar og þurrkuðu timjani og inn í 200°C heitan ofn.

Næst hitaði ég smjör á pönnu og steikti kjötið á báðum hliðum til að loka því og fá fallegan steikingarlit á það, setti það svo í ofnskúffu og inn í ofninn. Ég lét kjötið vera í 25 mínútur, þetta voru 700-800 grömm, og svo hvíldi ég það á borði í 10 mínútur áður en ég skar það. Grænmetið var áfram inni þar til það var búið með um 50-60 mínútur. Þegar kjötið var komið úr ofninum gerði ég sósuna.

Ég tók sömu pönnu og ég steikti kjötið í, hellti smjör/vökvanum af steikinni ofan í hana og bætti við 2 dl vatni og hrærði svo venjulega pakkapiparsósu út í. Ég sauð hana samkvæmt fyrirmælum á pakkningu og bætti svo 1/2 dl af rjóma út í.

Þetta var allt og sumt. Svo lögðum við á borð og kveiktum á kertum og nutum matarins. Það eina sem ég hefði viljað bæta var að mig vantaði eitthvað grænt á diskinn. Það hefði getað verið soðið brokkolí eða ferskt salat eða eitthvað svoleiðis, en að öðru leyti heppnaðist máltíðin mjög vel.

Þar til næst,
Ragnhildur

Ég átti svo yndislegt föstudagskvöld í gær með Unu systur og Ástríði vinkonu hennar. Við áttum miða á Gullregn í Borgarleikhúsinu en náðum okkur fyrst í mat á Bergsson Mathúsi og borðuðum heima. Við fengum okkur spínatlasanja staðarins og það var himeskt, það var svo gott. Bergsson er að verða einn af mínum allra uppáhaldsstöðum til að borða, maturinn er svo góður og hollur. Súrdeigsbrauðið þeirra líka, það er algjörlega to die for. Að sjálfsögðu hugsaði ég ekki út í að taka mynd af matnum fyrr en ég var búin með hann og búin að sleikja diskinn, svona nánast.

Eftir matinn drifum við okkur svo í leikhúsið á Gullregn. Þessi sýning er svo frábær, ég mæli hiklaust með henni. Þetta verk er svona, samfélagsádeila í nútímanum og kemst alveg óþægilega nærri sannleikanum, en samt getur maður ekki annað en hlegið, nákvæmlega af sömu ástæðu. Halldóra Geirharðs leikkona leikur svo brálæðislega fyndinn karakter, ég hélt á stundum að ég myndi hreinlega pissa á mig úr hlátri. Svo er öll umgjörðin líka alveg upp á tíu. Leikmyndin er frábær, alveg niður í minnstu smáatriði og skiptingarnar á milli atriða er mjög flottar, en óvenjulegar fyrir leikhúsið.

Þannig að ef ykkur langar í góða kvöldstund þá mæli ég með mat frá Bergsson og Gullregnssýningunni.

Þangað til næst,
R

Chicken soup for the body and soul

Stundum koma svona dagar eða vikur þar sem orkan hjá mér er gjörsamlega í núlli og þá hrúgast verkefnin auðvitað inn á sama tíma. Ég er búin að vera á þönum alla vikuna og hef ekki náð að elda neitt af viti, en samt langað svo mikið í heitan og góðan mat sem yljar kropp og sál og ekki síst vegna vetrarveðursins úti. Ég varð því brálæðislega æst af gleði á leiðinni heim í dag þegar ég mundi að ég átti einn skammt af kjúklingasúpu í frysti frá því um daginn.
Ég eldaði hana í hádegismat á laugardegi fyrir nokkrum vikum þegar litli frændi minn var í heimsókn og veðrið var einmitt að gera okkur lífið leitt. Þá tók ég til í ísskápnum og setti slatta af þessu og dass af hinu en hún kom ljómandi vel út. Ég man í grófum dráttum hvaða hráefni ég notaði en svona súpur eru svo æðislegar því þær koma alltaf vel út. Þá bar ég hana fram með sýrðum rjóma, osti og nachos en í kvöld grillaði ég hálfa samloku með osti fyrir mig, en með osti, salsa og skinku fyrir betri helminginn. Svo átti ég rosalega gott jalapeno sour cream nachos sem ég keypti í Nóatúni, sem ég get mælt með, hvort sem er með súpu eða eintómt.

nomnomnom

Kjúklingasúpa í grófum dráttum
olía
1 laukur
1 hvítlauksrif
1 rautt chilli ef vill
1 paprika
3-4 gulrætur
2 dósir tómatar (má nota passata eða tómatsafa með)
væn skvetta chilli tómatsósa
1-2 dósir vatn, eða eftir smekk
1-2 teningar kjúklingakraftur
salt og pipar
cayenne pipar ef vill
1 dós nýrnabaunir
eldaður kjúklingur, ca 2 bringur eða 1/2 kjúklingur

Skerið grænmetið í litla bita og steikið í olíu á miðlungshita í stórum potti í góða stund. Bætið tómötunum, tómatsósu, vatni og krafti út í og látið malla í að lágmarki 30 mínútur, en helst í að minnsta kosti 60 mínútur, eða þar til grænmetið er alveg eldað í gegn. Magnið af vökvanum fer svolítið eftir því hvað þið viljið sjálf hafa súpuna þykka og mikla. Þið getið byrjað á einni dós af tómötum og bætt hinni við seinna ef ykkur finnst þurfa. Takið af hitanum og maukið með töfrasprota eða blandara ef vill. Setjið aftur á hita, kryddið með salti og pipar. Skerið kjúklinginn niður og bætið út í ásamt nýrnabaununum og hitið í gegn.
Svo mæli ég með því að frysta afganginn í litlum boxum fyrir langa daga eins og í dag. Það getur alveg bjargað manni.

Það eina við að vera lítið heimili með stóran súpupott er að mann langar kannski ekki í sömu súpuna fjórum sinnum í matinn, þótt ég eigi reyndar yfirleitt auðvelt með það. En ég var að spá hvort maður gæti ekki komið á fót einhvers konar súpu-skiptimarkaði í fjölskyldu- og vinahópnum? Eldað stóran skammt af súpu og sett í lítersbox og skipt á súpum við aðra! Þá ætti maður kjötsúpu, mexíkóska súpu, þykka grænmetissúpu, thaílenska súpu og gulrótarsúpu eða eitthvað álíka til í frystinum. Kannski er ég bara þreytt, en mér finnst þetta bráðskemmtileg hugmynd. Got soup?

Þar til næst,
Ragnhildur

Ég er enn að jafna mig á öllum frábæra matnum sem ég borðaði um helgina. Ég fór á þrjá veitingastaði og í tvær veislur og það er því ekki skrýtið! En helgin var æðisleg í alla staði enda var var ég í góðum félagsskap. Þessi ofur-matarhelgi byrjaði eiginlega á fimmtudaginn með matarboðinu. Á föstudaginn fór ég svo á Bergsson Mathús í hádegismat, fékk dásemdar Thai súpu og súrdeigsbrauð að sjálfsögðu. Ég mæli svo sannarlega með Bergsson, maturinn þar er svo hollur og góður.
Um kvöldið fór ég svo með vinnunni á Austur-Indía fjelagið og pöntuðum við öll Hátíð Ljóssins matseðilinn. Maturinn var himneskur, fimm réttir sem voru hver öðrum betri, og lambið með myntusósunni. Namm. Ekki skemmdi rauðvínið fyrir matnum heldur.
Á laugardaginn var svo mjög fjörugt og skemmtilegt tvöfalt barnaafmæli í hádeginu með yndislegum veitingum, súpu, brauði, kökum og öllu tilheyrandi og matarboð um kvöldið með geðveikt góðri vetrarsúpu og alls kyns meðlæti.
Sunnudagsmorguninn hófst svo á brunch á Nítjándu! Ég var ekkert að grínast, þessi helgi var löðrandi í mat. Enda lá ég afvelta í sófanum restina af sunnudeginum á meltunni og þegar það var kominn tími á kvöldmat... þá var ekki séns að slaka eitthvað á í kröfunum, brauð með bökuðum baunum og osti! ha ha.

En þessi helgi varð líka til þess að ég náði ekkert að elda eða baka sjálf. En ég hlýt nú að bæta úr því innan bráðar. Ég ætla líka að fara og kaupa mér myndavél enda löngu kominn tími til, það er svo ótrúlega leiðinlegt að setja inn ljótar myndir á matarblogg.
Þar til næst,
R

Ég ligg upp í sófa með fartölvuna í fanginu, gjörsamlega uppgefin eftir að hafa eldað og vaskað upp fyrir þriggja rétta, sex manna matarboð í kvöld. En það var vel þess virði fyrir ljúfa kvöldstund og góðan mat. Ég keypti hrefnuhakk í Iceland í einhverju gríni í haust og henti í frystinn en vissi ekkert hvað ég ætti að elda úr því. En ég ákvað loks að prófa það í rétt og gera ítalskar kjötbollur. En þar sem ég var í þessari tilraunastarfsemi þorði ég ekki annað en að hafa forrétt líka, svona svo að ef bollurnar væru lýsislegnar og óætar, að fólk hefði eitthvað ofan í sig.

Ég tilheyri hinum alræmda hópi B-manneskja. Ég fer seint á fætur, þýt um íbúðina í leit að því sem ég þarf að taka með mér og hleyp út 10 mínútum of seint og alltaf án þess að fá mér morgunverð. Svo var það í haust að ég rakst á uppskrift að hafragraut sem er búinn til kvöldið áður og bíður tilbúinn í ísskápnum um morguninn. Síðan þá hefur þetta verið morgunmaturinn okkar beggja á heimilinu. Þessi hafragrautur er súper-einfaldur og fljótlegur, það þarf ekki að elda neitt og hann er svo bragðgóður að það er hálfótrúlegt að öll hráefnin séu svona holl fyrir mann.

Einn af fyrstu grautunum sem ég gerði, með AB mjólk, höfrum, chia, banönum og jarðarberjum

Mér finnst ég alltaf verða betri og betri að finna hluti í ísskápnum og elda án þess að fylgja uppskrift eða réttum sem ég hef borðað áður. Ég verð að segja að mér finnst það svolítið skemmtilegt þegar eitthvað samansull bragðast svona vel. Þessi pastaréttur er rosalega einfaldur og fljótlegur og ég var nú ekkert að finna upp hjólið en mér fannst hann mjög góður á bragðið.




Penne pasta fyrir tvo (170-200 gr)

Ég hitaði vatn í potti að suðu, saltaði og hellti pastanu út í. Ég skar strengjabaunirnar í tvennt, en þær mega auðvitað vera heilar, og setti þær út í pastapottinn þegar fjórar mínútur voru eftir af suðutímanum á pastanu. Á lítilli pönnu hitaði ég oliu og smá smjörklípu og steikti hvítlaukinn, chiliið og tómatana. Ég hellti svolítlu af olíunni af tómötunum út á pönnuna svo ég væri örugglega með nóg til að þekja allt pastað. Ég saltaði vel og setti smá pipar. Ég hellti pastanu og baununum í sigti og setti svo aftur í tóman pottinn og hellti tómatolíusósunni út í og hrærði saman. Þetta var rosalega fljótlegur og einfaldur réttur og mikið agalega fannst mér hann góður á bragðið. Ég ætla að gera þennan rétt aftur, það er nokkuð víst. Sósan er eiginlega bara eins og salatdressing á pastað og baunirnar, og chiliið og saltið gáfu gott kick.

Ég ákvað að nefna þennan rétt kósýkjúkling því mér datt ekkert betra orð í hug yfir eitthvað sem væri eins og comfort food. Þessi kjúklingur er fullkominn þegar mann langar í djúsí og djúpsteiktan óhollustukjúkling, en vill ekki alveg detta í sukkið. Þetta er ekta helgarmatur, og mjög auðveldur í framkvæmd. Ég eldaði hann á föstudaginn og við vorum svo gráðug í matinn að við borðuðum hann áður en ég mundi eftir að taka mynd.  Ég var með 5-6 kjúklingalundir fyrir okkur tvö og gerði hálfa uppskrift af mylsnunni en ég set hér uppskriftina heila, sem passar þá fyrir fjóra.

Kjúklingur
900 gr kjúklingalundir, eða bringur skornar langsum
1/3 bolli hveiti
1/3 bolli brauðraspur
1/3 bolli mulið kornflex
2 eggjahvítur, léttþeyttar
1-2 tsk salt (má vera hvítlaukssalt eða eitthvað svoleiðis ef til)
1 tsk sítrónupipar

Ég ristaði brauðenda og reif niður í blandaranum mínum til að búa til brauðrasp en það er auðvitað hægt að kaupa tilbúinn rasp, ef þið notið tilbúinn athugið þá hvort það sé salt í honum og minnkið þá saltmagnið.
Hveitið er sett á einn disk, eggjahvítan á annan, eða í skál og brauðraspinum, kornflexinu, saltinu og piparnum blandað saman á þriðja disknum.
Kjúklingum er þá velt upp úr hveiti, þá eggjahvítu og loks kornflexblöndunni. Raðað á bökunarplötu eða í form, leyft að standa í 15 mínútur og svo bakað í heitum ofni í ca 15 mínútur eða þar til gegnsteikt. Ég setti smá olíu á botninn á mótið en það þarf ekkert endilega, sérstaklega ekki ef maður notar bökunarpappír undir.

Meðlætið var svo kartöflumús og kúrbítur, bitaður niður og steiktur upp úr smjöri á pönnu með smá hvítlauk. Annars væri þessi kjúklingur líka mjög góður með frönskum, maís og hrásalati.

Hummus er alveg eitt það besta sem ég veit um. Hann er hollur og bragðgóður og svo er bæði ódýrt og létt að búa hann til. Ég hef oft hent kjúklingabaunum í matvinnsluvél eða blandara og sett út í hitt og þetta til að prófa bragðefni.
Í venjulegum hummus er sett tahini eða sesamsmjör, en ég nota það ekki í neitt annað þannig að ég hef ekki tímt og nennt að kaupa það, fyrir einhverja 1 teskeið í hummus. Ég hef vanalega bara sleppt því og punktur. En ég var farin að spá hvort það væri hægt að nota hnetusmjör þegar ég rakst á uppskrift í Nigella Kitchen að hnetusmjörshummus og ég hef notað það í staðinn fyrir tahini undanfarið. Hnetusmjörshummus er pínu öðruvísi á bragðið en venjulegur hummus en samt mjög góður. Ég nota minna hnetusmjör en Nigella, enda er hennar uppskrift meira hugsuð á borð með snakki og bjór eða einhverju svoleiðis, en ég nota hummusinn sem kvöldmat og nesti.
Þessi uppskrift er mjög fljótleg, ef einhver boðar sig óvænt í mat, þá er nokkurnveginn hægt að  "elda" þetta á 10 mínútum.

Hnetusmjörshummus fyrir 2-3
1 dós kjúklingabaunir, hella vökvanum af og skola í köldu vatni
2-3 msk ólífuolía
1-2 msk hnetusmjör (byrja á einni og smakka til)
1-2 msk sítrónusafi
1 tsk maldon salt
1 tsk mulið cummin (ekki kúmen)
2-3 msk grísk jógúrt (eða sýrður rjómi eða ab mjólk eða hrein jógúrt)
smá pipar ef vill
Það má setja hálft hvítlauksrif en mér finnst það óþarfi.
Henda öllu í matvinnsluvél eða blandara og hræra saman, það er allt í lagi þótt sumar kjúklingabaunirnar séu hálfsaxaðar, það kemur skemmtileg áferð ef hummusinn er grófur. Svo er bara að smakka hann til og bæta við jógúrt og olíu ef hann er of þykkur. Á Íslandi myndi ég kaupa létt-sósu með graslauk og bera fram með ásamt salati, papriku, gúrku og pítubrauði eða tortillapönnsum. Oft hita ég hummusinn á pönnu áður en ég set hann í brauðið, það kemur mjög vel út, svona þegar mann vantar að fá heitan kvöldmat. Hann þarf bara augnablik á pönnu til að hitna í gegn og það þarf að passa sig að hræra í honum svo hann brenni ekki í botninn. En ég myndi ekki gera það ef ég væri að undirbúa nesti.

Ég gerði einu sinni líka svakalega góðan hummus með limesafa og limeberki rifnum út í, hann varð svo frískur og bragðgóður, en fólk verður auðvitað að fíla lime fyrir það. Sá hummus hentaði ekki sem máltíð, en passaði rosalega vel með tortillaflögum. Þetta minnti mig á uppáhalds Doritosið mitt sem er ekki lengur til, LimeDoritos.

Þar sem ég er búin að vera lasin og slöpp undanfarna daga hef ég ekkert nennt í búðina. Maturinn í kvöld var þess vegna það-sem-er-til-í-skápunum-á-pönnu. Fyrst ég átti opna kókoksmjólk í ísskápnum vissi ég að ég yrði að finna eitthvað í asískum stíl og eftir smá grams í eldhúsinu og hugmyndaleit á netinu varð þetta útkoman: